admin
ରାୟଗଡ଼ା: ରାୟଗଡ଼ା ଜିଲ୍ଲାର କାଶୀପୁର ବ୍ଲକ ଅନ୍ତର୍ଗତ ଶିଜିମାଳି ଖଣି ଅଞ୍ଚଳରେ ରାସ୍ତା ନିର୍ମାଣକୁ କେନ୍ଦ୍ର କରି ପୋଲିସ ଓ ଗ୍ରାମବାସୀଙ୍କ ମଧ୍ୟରେ ଘଟିଥିବା ହିଂସାତ୍ମକ ସଂଘର୍ଷ ଏବେ ଗୁରୁତର ଆକାର ଧାରଣ କରିଛି। ଏହି ଘଟଣା ଅଞ୍ଚଳରେ ଚିନ୍ତାଜନକ ପରିସ୍ଥିତି ସୃଷ୍ଟି କରିଛି।ଏହି ପରିସ୍ଥିତିକୁ ଗଭୀର ଭାବେ ଗ୍ରହଣ କରି ବିଜୁ ଜନତା ଦଳର ଏକ ପ୍ରତିନିଧି ଦଳ ଘଟଣାସ୍ଥଳକୁ ପହଞ୍ଚି ସ୍ଥିତିର ସମୀକ୍ଷା କରିଛନ୍ତି। ପ୍ରତିନିଧି ଦଳ ଗ୍ରାମବାସୀଙ୍କ ସହ ସକ୍ଷାତ୍ କରି ସମସ୍ତ ପରିସ୍ଥିତି ବିଷୟରେ ଅବଗତ ହୋଇଥିବା ସୂଚନା ମିଳିଛି।
ଦଳ ପକ୍ଷରୁ କୁହାଯାଇଛି ଯେ, ଏହି ଅସନ୍ତୋଷର ମୂଳ କାରଣକୁ ବୁଝିବା ଓ ତାହାର ସମାଧାନ କରିବା ଅତ୍ୟାବଶ୍ୟକ। ବିଶେଷ କରି ଆଦିବାସୀ ଲୋକମାନଙ୍କର ଜଳ, ଜମି ଓ ଜଙ୍ଗଲ ଉପରେ ଅଧିକାରକୁ ସମ୍ମାନ ଦେଇ ଉନ୍ନୟନ କାର୍ଯ୍ୟ କରାଯିବା ଉଚିତ ବୋଲି ଦଳ ମତ ପ୍ରକାଶ କରିଛି।ସେହିପରି, ଶାନ୍ତିପୂର୍ଣ୍ଣ ପରିବେଶ ରକ୍ଷା କରି ଲୋକମାନଙ୍କର ମତାମତକୁ ସମ୍ମାନ ଦେଇ ସମସ୍ୟାର ସ୍ଥାୟୀ ସମାଧାନ କରିବାକୁ ଦଳ ଦାବି କରିଛି।
ଏହି ଗସ୍ତ ସମୟରେ ଆଠଗଡ଼ ବିଧାୟକ ରାଜା ସ୍ୱାଇଁ, ରାୟଗଡ଼ା ଜିଲ୍ଲା ବିଜେଡି ସଭାପତି ଜଗନ୍ନାଥ ସାରକା, କୋରାପୁଟ ଜିଲ୍ଲା ସଭାପତି ଝିନ୍ନ ହିକକା, ପୂର୍ବତନ ଆଦିବାସୀ ଉନ୍ନୟନ ପରିଷଦ ଅଧ୍ୟକ୍ଷା ଅନୁସୟା ମାଝି, ପୂର୍ବତନ ମନ୍ତ୍ରୀ ରବିନାରାୟଣ ନନ୍ଦ, କୋରାପୁଟ ଲୋକସଭା ପ୍ରାର୍ଥୀନୀ କୌଶଲ୍ୟା ହିକକା,ରାୟଗଡ଼ା ଜିଲ୍ଲା ପରିଷଦ ଅଧ୍ୟକ୍ଷା କୁମାରୀ ସରସ୍ୱତୀ ମାଝି, କୋରାପୁଟ ଜିଲ୍ଲା ପରିଷଦ ଅଧ୍ୟକ୍ଷା କୁମାରୀ ସସ୍ମିତା ମେଲକା , ବିଜେଡି ରାୟଗଡ଼ା ଜିଲ୍ଲା କାର୍ଯ୍ୟକାରି ସଭାପତି ଶ୍ରୀ ପି. ଗୌରୀ ଶଙ୍କର ରାଓ, ଶ୍ରୀ ଦବଲେଶ୍ଵର ନାଏଡୁ ସହ ଅନ୍ୟାନ୍ୟ ଜିଲ୍ଲା ଓ ସ୍ଥାନୀୟ ନେତୃବୃନ୍ଦ ଉପସ୍ଥିତ ଥିଲେ।ଏହି ଘଟଣାକୁ ନେଇ ଆଗାମୀ ଦିନରେ ପ୍ରଶାସନ କିପରି ପଦକ୍ଷେପ ନେବ ତାହା ଉପରେ ସମସ୍ତଙ୍କ ଦୃଷ୍ଟି ରହିଛି।
