admin
ରାୟଗଡ଼, ତା. ୨0/୦୧/୨୦୨୬ ଜିଲ୍ଲା ସ୍ତରରେ ୧୬ତମ ଜାତୀୟ ମତଦାତା ଦିବସ ପାଳନ କରାଯିବ। ଏହାର ପ୍ରସ୍ତୁତି ନିମନ୍ତେ ଉପଜିଲ୍ଲାପାଳଙ୍କ କାର୍ଯ୍ୟାଳୟରେ ଏକ ପ୍ରସ୍ତୁତି ବୈଠକ ଉପଜିଲ୍ଲାପାଳ ଶ୍ରୀଯୁକ୍ତ ରମେଶ କୁମାର ଜେନାଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଯାଇଛି।ଏହି ବୈଠକରେ ଉପନିର୍ଦ୍ଦେଶକ ତଥା ଜିଲ୍ଲା ସୂଚନା ଓ ଲୋକସମ୍ପର୍କ ଅଧିକାରୀ ଶ୍ରୀ ବସନ୍ତ କୁମାର ପ୍ରଧାନ, ରାୟଗଡ଼ ଓ କାଶୀପୁର ବିଡିଓ ଶ୍ରୀ ସୁଜିତ କୁମାର ମିଶ୍ର, ରାୟଗଡ଼ ପୌର ପରିଷଦ ନିର୍ବାହୀ ଅଧିକାରୀ ଶ୍ରୀ ଦିଲ୍ଲୀପ କୁମାର, ଜିଲ୍ଲାପାଳଙ୍କ କାର୍ଯ୍ୟାଳୟର ଡେପୁଟି କଲେକ୍ଟର ମାନୁଏଲା ପ୍ରିୟଦର୍ଶିନୀ ଓ ବିଚିତ୍ରା ସେଠୀ, ସହକାରୀ ଜିଲ୍ଲାପାଳ ଶ୍ରୀ କୈଳାସ ଚନ୍ଦ୍ର ସ୍ଵାଇଁ, ଶ୍ରୀମତୀ ପ୍ରଣତି ପାତ୍ର ଓ ଶ୍ରୀମତୀ ରୂପାଲି ଜେନା ଉପସ୍ଥିତ ଥିଲେ।ଏହା ସହ ରାୟଗଡ଼ ସ୍ୱୟଂଶାସିତ କଲେଜ, ରାୟଗଡ଼ ମହିଳା ମହାବିଦ୍ୟାଳୟ, ଆଇସିଆର, ଜିଷ୍ଟ କଲେଜ, ମଡେଲ ଡିଗ୍ରୀ କଲେଜ, ଶ୍ରୀ ଉଗ୍ରତାରା କଲେଜ ଆଦି ଶିକ୍ଷାନୁଷ୍ଠାନର ଅଧ୍ୟକ୍ଷ ଓ ଅଧ୍ୟାପକବୃନ୍ଦ ଯୋଗ ଦେଇଥିଲେ।ଆସନ୍ତା ୨୫ଜାନୁଆରୀ ସକାଳ ୮ଟା ସମୟରେ ଏକ ଭୋଟର ସଚେତନତା ରାଲି ରାୟଗଡ଼ ବ୍ଲକ କାର୍ଯ୍ୟାଳୟ ସମ୍ମୁଖରୁ ବାହାରି ଉପଜିଲ୍ଲାପାଳଙ୍କ କାର୍ଯ୍ୟାଳୟ ପାର୍ଶ୍ୱସ୍ଥ ଅଣ୍ଡରଗ୍ରାଉଣ୍ଡ ରାସ୍ତା ଓ ତହସିଲ କାର୍ଯ୍ୟାଳୟ ଦେଇ ବିଜୁ ପଟ୍ଟନାୟକ ପ୍ରେକ୍ଷାଳୟରେ ପହଞ୍ଚିବ। ଏହା ପରେ ସେଠାରେ ସାଧାରଣ ସଭା, ଶପଥପାଠ, ନୂତନ ମତଦାତାଙ୍କୁ ଭୋଟର ପରିଚୟ ପତ୍ର ବଣ୍ଟନ ସହ ସାଂସ୍କୃତିକ କାର୍ଯ୍ୟକ୍ରମ ଆୟୋଜିତ ହେବ ବୋଲି ଉପଜିଲ୍ଲାପାଳ ଶ୍ରୀ ଜେନା ସୂଚନା ଦେଇଛନ୍ତି।
ଓଡ଼ିଶା ମୁଖ୍ୟ ଶାସନ ସଚିବଙ୍କ ପତ୍ର ସଂଖ୍ୟା–୪୯୪,ତା. ୧୯/୦୧/୨୦୨୬ଅନୁଯାୟୀ ଆସନ୍ତା ୨୨ ଜାନୁଆରୀ ପୂର୍ବାହ୍ନ ୧୧ଟା ସମୟରେ ସମସ୍ତ କାର୍ଯ୍ୟାଳୟରେ ଜାତୀୟ ମତଦାତା ଦିବସ ଶପଥପାଠ କରାଯିବା ନିମନ୍ତେ ନିର୍ଦ୍ଦେଶ ଥିବାରୁ, ଏହାର ସଠିକ୍ ଅନୁପାଳନ ପାଇଁ ସମସ୍ତ କାର୍ଯ୍ୟାଳୟକୁ ଅବଗତ କରାଯିବ। ଏଥିସହ ବହୁସଂଖ୍ୟାରେ ଲୋକମାନଙ୍କୁ ପଦଯାତ୍ରାରେ ସାମିଲ ହେବାକୁ ଶ୍ରୀ ଜେନା ଅନୁରୋଧ କରିଛନ୍ତି।ସେହିପରି ଗ୍ରାମ୍ୟ ସ୍ତରରେ ମତଦାନ ରୂପେ ଗଣତାନ୍ତ୍ରିକ ପ୍ରକ୍ରିୟାକୁ ସୁଦୃଢ଼ କରିବା ନିମନ୍ତେ ପ୍ରତ୍ୟେକ ବୁଥ୍ ସ୍ତରରେ ମଧ୍ୟ ଜାତୀୟ ମତଦାତା ଦିବସ ପାଳନ କରାଯିବ ବୋଲି ଜଣାପଡ଼ିଛି।
