admin
ରାୟଗଡ଼ା: ରାୟଗଡ଼ା ସହର ରାମକୃଷ୍ଣ ନଗର ଅଞ୍ଚଳରେ ଶନିବାର ସନ୍ଧ୍ୟାରେ ଏକ ଜଘନ୍ୟ ଲୁଟ୍ ଘଟଣା ଘଟିଛି। ୪ନଂ ୱାର୍ଡ କାଉନସିଲର ସୁକାନ୍ତ ପରିଡ଼ାଙ୍କ ଘରେ ପଶି ଦୁଇଜଣ ମୁଖା ପିନ୍ଧିଥିବା ଦୁର୍ବୁତ ବର୍ଷକର ଝିଅର ବେକରେ ଛୁରୀ ଧରି ଧମକ ଦେଇ ସୁନା ଓ ରୂପା ଗହଣା ଲୁଟିନେଇଛନ୍ତି।
ସୂଚନା ଅନୁସାରେ, ସନ୍ଧ୍ୟା ପ୍ରାୟ ୫ଟା ସମୟରେ ଦୁଇ ଦୁର୍ବୁତ ଘରର ପଛପଟୁ ପ୍ରବେଶ କରିଥିଲେ। ସେ ସମୟରେ ଘରେ ସୁକାନ୍ତ ପରିଡ଼ାଙ୍କ ପତ୍ନୀ ଓ ତାଙ୍କ ଛୋଟ ଝିଅ ଥିଲେ। ଦୁର୍ବୁତମାନେ ଝିଅର ପ୍ରାଣ ନେବାର ଧମକ ଦେଇ ଘରେ ଥିବା ସମସ୍ତ ଗହଣା ଦେବାକୁ ବାଧ୍ୟ କରିଥିଲେ।ଝିଅର ପ୍ରାଣ ବଞ୍ଚାଇବାକୁ ସୁକାନ୍ତଙ୍କ ପତ୍ନୀ ଦୁଇ ହଳ କାନଫୁଲ, ମଙ୍ଗଳସୂତ୍ର, ଦୁଇ ହଳ ରୂପା ପାଉଁଜି ଓ ଛୋଟ ଝିଅର ୪ଟି ଖଡ଼ୁ ଦୁର୍ବୁତମାନଙ୍କୁ ଦେଇଥିଲେ। ଗହଣା ନେଇ ଦୁର୍ବୁତମାନେ ଘଟଣାସ୍ଥଳରୁ ପଳାଇଯାଇଥିଲେ।
ଘଟଣା ପରେ ସୁକାନ୍ତ ପରିଡ଼ାଙ୍କ ପତ୍ନୀ ଫୋନ୍ ଯୋଗେ ସମସ୍ତ ଘଟଣା ସ୍ୱାମୀଙ୍କୁ ଜଣାଇଥିଲେ। ସୂଚନା ପାଇ ସୁକାନ୍ତ ତୁରନ୍ତ ଘରେ ପହଞ୍ଚି ରାୟଗଡ଼ା ଟାଉନ ଥାନାକୁ ଖବର ଦେଇଥିଲେ।ଖବର ପାଇ ପୋଲିସ ଅନୁସନ୍ଧାନୀ କୁକୁର ସହିତ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ଏହି ଘଟଣାର ତଦନ୍ତ ରାୟଗଡ଼ା ଟାଉନ ଥାନା ଆଇଆଇସି ପ୍ରସନ୍ନ କୁମାର ବେହେରା ନିଜେ କରୁଥିବା ଜଣାପଡିଛି।
