admin
ଆଜି ହୋଟେଲ ତେଜସ୍ୱୀ ଇଣ୍ଟରନ୍ୟାସନାଲରେ “କେବିକେ ସୁରକ୍ଷା ଓ ଉନ୍ନୟନ ପରିଷଦ”ର ଆନୁଷ୍ଠାନିକ ଶୁଭାରମ୍ଭ ଏବଂ ଜିଲ୍ଲା ସଭାପତିଙ୍କ ନିଯୁକ୍ତି ସମାରୋହ ଉପଲକ୍ଷେ ଏକ ସାମ୍ବାଦିକ ସମ୍ମିଳନୀ ଅନୁଷ୍ଠିତ ହୋଇଯାଇଛି।ଏହି ସମାରୋହରେ ଶ୍ରୀମତୀ ବିଦୁଲତା ହୁଇକାଙ୍କୁ କେବିକେ ସୁରକ୍ଷା ଓ ଉନ୍ନୟନ ପରିଷଦର ରାୟଗଡା ଜିଲ୍ଲା ସଭାପତି ଭାବେ ନିଯୁକ୍ତ କରାଯାଇଛି।
କେବିକେ ପରିଷଦ କେବିକେ ଅଞ୍ଚଳର ଜିଲ୍ଲାଗୁଡ଼ିକର ସାମାଜିକ, ଅର୍ଥନୈତିକ ଓ ସାଂସ୍କୃତିକ ବିକାଶକୁ ଲକ୍ଷ୍ୟ କରି କାର୍ଯ୍ୟ କରିବ। ପ୍ରକଳ୍ପର ପ୍ରଥମ ପର୍ଯ୍ୟାୟରେ ମାଲକାନଗିରି, କୋରାପୁଟ, ରାୟଗଡା ଓ ନବରଙ୍ଗପୁର—ଏହି ଚାରୋଟି ଜିଲ୍ଲା ଉପରେ ବିଶେଷ ଧ୍ୟାନ ଦିଆଯିବ।
ସାମ୍ବାଦିକ ସମ୍ମିଳନୀରେ ପରିଷଦର ଅଧ୍ୟକ୍ଷ ଶ୍ରୀ ହରିଶ ଚନ୍ଦ୍ର ପରିଡା ଅଧ୍ୟକ୍ଷତା କରିଥିବା ବେଳେ, ରାଜ୍ୟ ସାଧାରଣ ସମ୍ପାଦକ ଶ୍ରୀ ଜୀବନ ଜ୍ୟୋତି ଗଡନାୟକ ଓ ରାୟଗଡା ଜିଲ୍ଲା ସଭାପତି ଶ୍ରୀମତୀ ବିଦୁଲତା ହୁଇକା ଉପସ୍ଥିତ ଥିଲେ।
ଏହି ଅବସରରେ ଅଧ୍ୟକ୍ଷ ଶ୍ରୀ ପରିଡା କହିଥିଲେ ଯେ, ଜିଲ୍ଲାରେ ବ୍ୟବହୃତ ବିଭିନ୍ନ ସରକାରୀ ପାଣ୍ଠି ଉପରେ ସଚେତନତା ସୃଷ୍ଟି କରିବା, ତାହାର ସଠିକ୍ ବ୍ୟବହାର ପାଇଁ ପ୍ରହରୀ ଭାବେ କାମ କରିବା, ଅଭିଯୋଗ ସମାଧାନ ଉପରେ ଗୁରୁତ୍ୱ ଦେବା ସହିତ ସମାଜ ଓ ସରକାରଙ୍କ ମଧ୍ୟରେ ଏକ ସେତୁ ଭାବେ ପରିଷଦ କାର୍ଯ୍ୟ କରିବ।ସାମ୍ବାଦିକ ସମ୍ମିଳନୀର ଶେଷରେ ଶ୍ରୀ ଜୀବନ ଜ୍ୟୋତି ଗଡନାୟକ ଧନ୍ୟବାଦ ଅର୍ପଣ କରିଥିଲେ।
