admin
ଜିଲ୍ଲାର ପ୍ରମୁଖ ଚାଷୀ ଓ ସ୍ୱୟଂ ସହାୟକ ଗୋଷ୍ଠୀ ସମ୍ବର୍ଦ୍ଧିତ
ଜିଲ୍ଲାସ୍ତରୀୟ ଦୁଇଦିନିଆ ମାତ୍ସ୍ୟ ଓ ପ୍ରାଣୀସମ୍ପଦ ମେଳା ଆଜି ସଫଳତାର ସହ ଉଦଯାପିତ ହୋଇଛି। ଏହି ଅବସରରେ ମୁଖ୍ୟ ଅତିଥି ଭାବେ ଜିଲ୍ଲା ପରିଷଦ ରାୟଗଡ଼ାର ଅଧ୍ୟକ୍ଷା ସୁଶ୍ରୀ ସରସ୍ବତୀ ମାଝୀ ଯୋଗଦେଇ ସମବେତ ଚାଷୀମାନଙ୍କୁ ପ୍ରାଣୀସମ୍ପଦ ଓ ମତ୍ସ୍ୟ ଚାଷର ଗୁରୁତ୍ୱ ଏବଂ ସମ୍ଭାବନା ବିଷୟରେ ଅବଗତ କରାଇଥିଲେ।
ସମ୍ମାନିତ ଅତିଥି ଭାବେ ଅତିରିକ୍ତ ଜିଲ୍ଲାପାଳ ଶ୍ରୀ ନବୀନ ଚନ୍ଦ୍ର ନାଏକ ଯୋଗଦେଇ ସରକାରଙ୍କ ବିଭିନ୍ନ ଯୋଜନା ଅଧୀନରେ ମିଳୁଥିବା ରିହାତି ଓ ସହାୟତା ସୁବିଧାର ସଦ୍ବ୍ୟବହାର କରିବାକୁ ଚାଷୀମାନଙ୍କୁ ଆହ୍ୱାନ କରିଥିଲେ। ଏହି ଅବସରରେ ସେ ଯୋଗ୍ୟ ଚାଷୀମାନଙ୍କୁ ସର୍ଟିଫିକେଟ୍ ବିତରଣ ମଧ୍ୟ କରିଥିଲେ।
ଆତ୍ମନିର୍ଭରତା ହିଁ ବିକଶିତ ଭାରତର ମୂଳ ମନ୍ତ୍ର” ଶୀର୍ଷକ ସ୍ଲୋଗାନ୍ ସହିତ ରାଜ୍ୟ ମାତ୍ସ୍ୟ ଓ ପ୍ରାଣୀସମ୍ପଦ ମନ୍ତ୍ରୀ ଶ୍ରୀ ଗୋକୁଳାନନ୍ଦ ମଲ୍ଲିକ ଭିଡିଓ ମାଧ୍ୟମରେ ଚାଷୀମାନଙ୍କୁ ଉତ୍ସାହିତ କରିଥିଲେ।ଏହି କାର୍ଯ୍ୟକ୍ରମରେ ସିଭିଡିଓ ଡ଼. ମୃଣ୍ମୟ କୁମାର ପଣ୍ଡା, ଡେପୁଟି ଡାଇରେକ୍ଟର ମାତ୍ସ୍ୟ ଶ୍ରୀ ଜିତେନ୍ଦ୍ର ବେହେରା, ଜିଲ୍ଲା ମତ୍ସ୍ୟ ଅଧିକାରୀ ଶ୍ରୀ ସୁଶାନ୍ତ ଗୌଡ଼, ବୈଜ୍ଞାନିକ ଡ଼. ବିରଞ୍ଚି ନାରାୟଣ ମିଶ୍ର, ଉପନିର୍ଦ୍ଦେଶକ (ପ୍ରାଣୀ ଚିକିତ୍ସା) ଡ଼. ଅଶୋକ କୁମାର ବେହେରା, ସହକାରୀ ମତ୍ସ୍ୟ ଅଧିକାରୀ ଶ୍ରୀ ଅଶ୍ୱିନୀ କୁମାର ବିଶ୍ୱାଳ ଓ ସେନଚୁରିଆନ ବିଶ୍ୱବିଦ୍ୟାଳୟର ସହକାରୀ ପ୍ରାଧ୍ୟାପକ ଶ୍ରୀ ପ୍ରିତମ କୁମାର ତ୍ରିପାଠୀ ପ୍ରମୁଖ ଯୋଗଦେଇ ମତ୍ସ୍ୟ ଚାଷ, ଗୋ-ପାଳନ, ମିଶ୍ରିତ ଓ ଜୈବିକ ଚାଷର ଲାଭ ସମ୍ପର୍କରେ ଚାଷୀମାନଙ୍କୁ ଅବଗତ କରାଇଥିଲେ।
ଏହି ଅବସରରେ କୋଲନାରାର ଉତ୍କୃଷ୍ଟ ଚାଷୀ କୋଦରୁ ଈଶାକା, ଗୁଡ଼ାରୀର ମତ୍ସ୍ୟ ଚାଷୀ ଆରାଧ ଜାଗେରାଙ୍ଗା ଏବଂ ପଦ୍ମପୁର ଓ କାଶୀପୁର ବ୍ଲକର ସ୍ୱୟଂ ସହାୟକ ଗୋଷ୍ଠୀମାନଙ୍କୁ ଚାଷ କ୍ଷେତ୍ରରେ ସଫଳତା ପାଇଁ ୫,୦୦୦ ଟଙ୍କାର ଚେକ ସହ ସର୍ଟିଫିକେଟ୍ ପ୍ରଦାନ କରି ସମ୍ବର୍ଦ୍ଧିତ କରାଯାଇଥିଲା।
ଦୁଇଦିନିଆ ଏହି ମେଳାରେ ଗୁଣୁପୁର, ପଦ୍ମପୁର, ରାମନାଗୁଡ଼ା, କୋଲନାରା ଓ ମୁନିଗୁଡ଼ା ବ୍ଲକର ବହୁ ଚାଷୀ ଯୋଗଦେଇଥିଲେ। ସ୍ୱୟଂ ସହାୟକ ଗୋଷ୍ଠୀ, ଗୋ-ଚାଷୀ, ଛେଳି, କୁକୁଡ଼ା, ଘୁଷୁରୀ ଓ ମତ୍ସ୍ୟ ଚାଷୀମାନେ ତାଙ୍କର ଉତ୍ପାଦ ଓ ପ୍ରଦର୍ଶନୀ ମଣ୍ଡପ ମାଧ୍ୟମରେ ଚାଷ ପ୍ରଣାଳୀ ଉପସ୍ଥାପନ କରିଥିଲେ।
କାର୍ଯ୍ୟକ୍ରମର ଶେଷରେ ସାଂସ୍କୃତିକ କାର୍ଯ୍ୟକ୍ରମ ଆୟୋଜିତ ହୋଇଥିଲା। ସମଗ୍ର କାର୍ଯ୍ୟକ୍ରମକୁ ଶ୍ରୀ ଉତ୍ତମ କୁମାର ଦାସ ସୁଚାରୁ ଭାବେ ସଂଯୋଜନା କରିଥିଲେ।
