admin
ରାୟଗଡ଼ା, ୧୯ /0୧/୨୬ ରାୟଗଡ଼ା ଜିଲାର ଅଧିଷ୍ଠାତ୍ରୀ ଦେବୀ ମା’ ମଝିଘରିଆଣୀଙ୍କ ମନ୍ଦିରର ୯ଟି ହୁଣ୍ଡି ସୋମବାର କଡ଼ା ସୁରକ୍ଷା ମଧ୍ୟରେ ଖୋଲାଯାଇ ଗଣତି କରାଯାଇଛି। ଦୀର୍ଘ ୬ ମାସ ପରେ ପ୍ରଶାସନିକ ଅଧିକାରୀ ଓ ଟ୍ରଷ୍ଟ ବୋର୍ଡର ଉପସ୍ଥିତିରେ ହୋଇଥିବା ଏହି ଗଣତିରୁ ମୋଟ ୧,୦୫,୫୨,୮୪୫ ଟଙ୍କା (ଏକ କୋଟି ପାଞ୍ଚ ଲକ୍ଷ ବାଉନ ହଜାର ଆଠ ଶହ ପଞ୍ଚଚାଳିଶ ଟଙ୍କା) ସଂଗୃହୀତ ହୋଇଛି। ଏଥିସହ ମା’ଙ୍କ ଭଣ୍ଡାରରୁ ଶ୍ରଦ୍ଧାଳୁଙ୍କ ଦ୍ୱାରା ଅର୍ପିତ ପ୍ରାୟ ୩୦ ଗ୍ରାମ ସୁନା ଏବଂ ୨ କିଲୋ ୧୫୦ ଗ୍ରାମ ରୂପା ଅଳଙ୍କାର ମଧ୍ୟ ମିଳିଛି। ଆଜି ସକାଳ ୯ଟାରୁ ୟୁନିଅନ ବ୍ୟାଙ୍କ ଅଫ୍ ଇଣ୍ଡିଆ (ମୁଖ୍ୟ ଶାଖା)ର କର୍ମଚାରୀ, ବିଭିନ୍ନ ସ୍ବେଚ୍ଛାସେବୀ ସଂଗଠନର ମହିଳା ସଦସ୍ୟା ଏବଂ ମନ୍ଦିର ଟ୍ରଷ୍ଟ ବୋର୍ଡର କର୍ମଚାରୀମାନଙ୍କ ଗହଣରେ ଏହି ଗଣତି ପ୍ରକ୍ରିୟା ଆରମ୍ଭ ହୋଇ ସନ୍ଧ୍ୟା ପର୍ଯ୍ୟନ୍ତ ଚାଲିଥିଲା।
ଏଠାରେ ସୂଚନାଯୋଗ୍ୟ ଯେ, ଏହା ପୂର୍ବରୁ ଗତ ୨୦୨୫ ଜୁଲାଇ ୭ ତାରିଖରେ ମା’ଙ୍କ ହୁଣ୍ଡି ଖୋଲାଯାଇଥିଲା। ସେହି ସମୟରେ ହୁଣ୍ଡିରୁ ନଗଦ ୧ କୋଟି ୪ ଲକ୍ଷ ୩୬ ହଜାର ୯୬୩ ଟଙ୍କା ସହିତ ୩୮ ଗ୍ରାମ ସୁନା ଓ ୨୫୦୫ ଗ୍ରାମ ରୂପା ବାହାରିଥିଲା। ଚଳିତ ଥରର ଗଣତିକୁ ପୂର୍ବଥର ସହ ତୁଳନା କଲେ ଜଣାପଡ଼େ ଯେ, ନଗଦ ଅର୍ଥ ସଂଗ୍ରହରେ ପ୍ରାୟ ୧ ଲକ୍ଷ ୧୫ ହଜାର ୮୮୨ ଟଙ୍କାର ବୃଦ୍ଧି ଘଟିଛି। ତେବେ ସୁନା ଓ ରୂପା ଦାନ ପରିମାଣରେ ପୂର୍ବଥର ଅପେକ୍ଷା ସାମାନ୍ୟ ହ୍ରାସ ପରିଲକ୍ଷିତ ହୋଇଛି। ଏହା ବ୍ୟତୀତ ଆଜିର ଗଣତିରେ ଭାରତୀୟ ମୁଦ୍ରା ସହିତ ବିଭିନ୍ନ ଦେଶର ବିଦେଶୀ ନୋଟ୍ ମଧ୍ୟ ବାହାରିଛି, ଯେଉଁଥିରେ ଆମେରିକୀୟ ଡଲାର, ୟୁଏଇ ଦିରହାମ୍, ଶ୍ରୀଲଙ୍କା ରୁପି, ବାହାରିନ ଦିନାର ଏବଂ ନେପାଳୀ ମୁଦ୍ରା ଆଦି ଅନ୍ତର୍ଭୁକ୍ତ ରହିଛି, ଯାହା ମା’ଙ୍କ ବିଶ୍ୱବ୍ୟାପୀ ପ୍ରସିଦ୍ଧିକୁ ପ୍ରମାଣିତ କରୁଛି।
ଗଣତି ସମୟରେ ମନ୍ଦିର ପରିସରରେ ଶାନ୍ତିଶୃଙ୍ଖଳା ରକ୍ଷା ପାଇଁ ବ୍ୟାପକ ପୋଲିସ ମୁତୟନ କରାଯାଇଥିବା ବେଳେ ସମଗ୍ର ପ୍ରକ୍ରିୟା ରାୟଗଡ଼ା ତହସିଲଦାର, ଦେବୋତ୍ତର ବିଭାଗର ଇନ୍ସପେକ୍ଟର ଏବଂ ମନ୍ଦିର ପରିଚାଳନା କମିଟିର ପ୍ରତ୍ୟକ୍ଷ ତତ୍ତ୍ୱାବଧାନରେ ଅତ୍ୟନ୍ତ ସ୍ୱଚ୍ଛତାର ସହ ସମ୍ପନ୍ନ ହୋଇଛି। ଗଣତି ଶେଷ ହେବା ପରେ ସମସ୍ତ ଅର୍ଥକୁ ତୁରନ୍ତ ୟୁନିଅନ ବ୍ୟାଙ୍କରେ ଥିବା ମନ୍ଦିର ଟ୍ରଷ୍ଟ ଆକାଉଣ୍ଟରେ ଜମା କରାଯାଇଛି। ଶ୍ରଦ୍ଧାଳୁଙ୍କ ଏହି ଦାନ ଅର୍ଥକୁ ଆଗାମୀ ଦିନରେ ମନ୍ଦିରର ଭିତ୍ତିଭୂମି ବିକାଶ, ସର୍ବାଙ୍ଗୀନ ଉନ୍ନତିକରଣ ଏବଂ ଦୂରଦୂରାନ୍ତରୁ ଆସୁଥିବା ଭକ୍ତଙ୍କ ପାଇଁ ଅଧିକ ସୁବିଧା ସୁଯୋଗ ଯୋଗାଇବା କାର୍ଯ୍ୟରେ ବିନିଯୋଗ କରାଯିବ ବୋଲି ଟ୍ରଷ୍ଟ ପକ୍ଷରୁ ସୂଚନା ପ୍ରଦାନ କରାଯାଇଛି।
